तपाईंको मत: राष्ट्रको भविष्य निर्माणको आधारशिला
मत ‘दान’ हो, ‘बिक्रीको वस्तु’ होइन
हाम्रो मत एउटा पवित्र ‘दान’ हो, बजारमा बेचिने वस्तु होइन। यसलाई क्षणिक प्रलोभन, मासुभातको भोज, वा व्यक्तिगत फाइदाको लागि कहिल्यै नबेचौं। आदर्श समाज निर्माणका लागि आदर्श नेतृत्व चाहिन्छ। तसर्थ, हाम्रो मतदानको आधार जात, धर्म, लिंग, पेशा, वा वर्ग हुनुहुँदैन। हामीले एउटा जिम्मेवार, सचेत, र विकासप्रेमी नागरिकको भूमिका निभाउँदै, जुनसुकै दल वा समुदायको भए पनि, एक असल उम्मेदवारलाई आफ्नो मत दिनुपर्छ।
असल उम्मेदवार कसरी चिन्ने?
सेवामुखी र उत्तरदायी: जसले तपाईंको समुदायको लागि काम गर्ने, जनताको सुख-सुविधा र अत्यावश्यक सेवाहरूलाई मितव्ययी, पारदर्शी, र परिणाममुखी ढंगले प्रदान गर्ने प्रतिबद्धता राख्छ।
दूरदर्शी र योजनाबद्ध: जससँग देश र जनताको प्रगतिको लागि स्पष्ट रोडम्याप छ र राष्ट्रलाई आन्तरिक वा बाह्य ऋणको पासोमा नपारी विकासको खाका कोर्न सक्छ।
जनताप्रति समर्पित: जो जनताको सच्चा शुभचिन्तक र हितैषी हो।
महँगो चुनाव: भ्रष्टाचारको पहिलो खुड्किलो
एक पटक आफैलाई सोध्नुहोस्, "धेरै खर्च गरेर चुनाव जित्ने नेता कसरी असल हुन सक्छ?" उसको बारीमा पैसा फल्ने बोट त पक्कै छैन। यदि उसले चुनावमा अन्धाधुन्ध खर्च गरेको छ भने, त्यो खर्च असुल गर्न उसले सार्वजनिक पद, शक्ति, सत्ता, र राज्यको स्रोत-साधनको दुरुपयोग गर्छ नै। यो एक तितो तर अकाट्य सत्य हो। जुन दलले समाजमा असल नेता स्थापित गर्न सक्दैन वा जुन समाजले असल नेता चिन्न सक्दैन, त्यसको पतन निश्चित छ। तसर्थ, आफ्नो पतनको कारण हामी आफैं नबनौं।
राजनीतिक प्रणालीको चुनौती र सुधारको बाटो
हुन त, हाम्रो वर्तमान राजनीतिक प्रणालीबाट असल नेतृत्वको अपेक्षा गर्नु चुनौतीपूर्ण छ। यहाँ नेता जनताले होइन, पार्टीले चुन्छ। र पार्टीले कस्ता व्यक्तिलाई चुन्छ, त्यो हामी सबैलाई थाहा छ—यस्ता व्यक्ति जो पार्टी हेडकमान्डलाई चुनौती नदिऊन्, हरेक निर्णयमा विनाप्रश्न सहमति जनाऊन्, र सीमित व्यक्तिको निहित स्वार्थपूर्तिका लागि सजिलै प्रयोग हुन सकून्। यस्तो अवस्थामा जनतासँग असल र समाजप्रेमी नेता चुन्ने विकल्प नै रहँदैन।
यसको समाधान के हो त? सायद, अब हामीले प्रत्यक्ष निर्वाचित कार्यकारी प्रमुख (राष्ट्रपति वा प्रधानमंत्री) को व्यवस्थाबारे सोच्ने बेला आएको छ। यस्तो प्रणालीले मात्र लोकतन्त्रको वास्तविक लाभ जनतासम्म पुग्न सक्छ। हामीले अमेरिकी लोकतन्त्रका कमजोरीहरूलाई जस्ताको तस्तै नक्कल गर्नुको सट्टा, त्यसको परिष्कृत रूप, सिंगापुरको विकास मोडेल, र हाम्रै लोकतन्त्रका सबल पक्षहरूलाई समेटेर नेपाल सुहाउँदो मोडेल बनाउन सक्छौं।
यस्तो व्यवस्थाले मात्र "सार्वभौमसत्ता जनतामा निहित रहनेछ" भन्ने वाक्यांशलाई नाममा मात्र सीमित नराखी, व्यवहारमा महसुस गराउन सक्छ र देशलाई साँचो अर्थमा विकास र समृद्धितर्फ डोऱ्याउन सक्छ।
आउनुहोस्, आफ्नो बहुमूल्य मतको शक्तिलाई चिनौं र राष्ट्रको सुनौलो भविष्य निर्माणमा एक जिम्मेवार नागरिकको रूपमा आफ्नो कर्तव्य पूरा गरौं।
#Politics #राजनीति #Governance
Comments
Post a Comment